ТР Төзелеш министрлыгында CIMC Кытай компаниясе делегациясе булды
Бүген Татарстан Республикасы Төзелеш, архитектура һәм торак-коммуналь хуҗалык министрлыгында China International Marine Containers – CIMC Кытай компаниясе делегациясе булды.
Министрлык җитәкчелеге катнашында узган очрашуда үзара файдалы хезмәттәшлек перспективалары турында фикер алыштылар. CIMC – йөк машиналары җитештерүнең дөньякүләм лидеры. Моннан тыш, компания башка юнәлешләр белән дә актив шөгыльләнә, шул исәптән төзелеш индустриясендә, махсус транспорт чаралары җитештерүдә, шулай ук энергетика, нефть чыгару, катлаулы технологик җиһазлар җитештерү һәм башка өлкәләрдә.
Татарстан өчен CIMCның кунакханә бизнесы, торак, мәктәпләр, хастаханәләр, мәгълүмат үзәкләре, шулай ук коммерцияле күчемсез милек төзү юнәлеше аеруча кызыклы булырга мөмкин.
Тәкъдим ителгән презентация буенча Кытай компаниясе төзелештә инновацион материаллар, яңа технологияләр һәм чишелешләр куллана. CIMC куәтләре ай саен 11400 каркас һәм 2500 әзер модуль җитештерергә мөмкинлек бирә.
CIMC төзелеш һәм финанс мөмкинлекләрен сәнәгатьне һәм шәһәрне стратегик үсеш алучы тармакларга игътибар белән интеграцияләү өчен эшчәнлекнең ике төп юнәлешендә куллана: индустриаль паркларны инвестицияләү һәм үстерү.