Яр Чаллыда илкүләм проект буенча басымлы канализация коллекторын төзәтәләр
Яр Чаллының 63 нче микрорайонында басымлы канализация коллекторын капиталь ремонтлау дәвам итә.
Әлеге объектта эшләр 2025 елда «Тормыш өчен инфраструктура» илкүләм проектының «Коммуналь инфраструктураны заманчалаштыру» федераль программасы кысаларында башланды.
Агымдагы елда 2588 метр торба салыначак, бу максатларга 111,6 млн сумнан артык акча юнәлдереләчәк. Төзүчеләр корыч торбаларны чыдамлы полиэтиленнан ясалганга, диаметры 110 мм һәм 225 мм булган горизонталь юнәлешле бораулауның инновацион ысулы белән алыштыралар. Бу технология торбаларны грунт ачмыйча гына салырга мөмкинлек бирә. Бу участокта торба салуны августта тәмамлау планлаштырыла. Хәзер үтәлеш 32 % ка җитте.
«ТР инженерлык челтәрләренең баш идарәсе» ДКУда хәбәр итүләренчә, корыч торба үткәргеч 1971 елда файдалануга тапшырылган. Бу вакыт эчендә челтәрләрнең тузуы 87% тан артып киткән: торбаларның эчке өслеге күгәрә башлаган, стеналарның калынлыгы яңа торба калынлыгының 70% тәшкил иткән. Тикшерелгән участокларда авария хәлләре берничә тапкыр бетерелде.
Басымлы канализация коллекторын капиталь ремонтлау нәтиҗәсендә Яр Чаллының 63 микрорайонында яшәүче 31543 кешегә хезмәт күрсәтү сыйфаты яхшырачак.
Яр Чаллыда «Яшәү өчен инфраструктура» илкүләм проекты буенча барлыгы 15 коммуналь инфраструктура объекты ремонтланачак.
Исегезгә төшерәбез, илкүләм проект кысаларында 17 объектны заманчалаштыру планлаштырыла, гомуми суммасы 2,5 млрд сум тәшкил итә. Программага шулай ук 2 объект кертелгән – Әлмәт һәм Лениногорск районнарында.