Татарстан кешесе «Төзелеш тармагы лидерлары» VI бөтенроссия идарәчеләр конкурсының ярымфиналына чыкты
Май аенда идарәчеләрнең «Төзелеш тармагы лидерлары» VI Бөтенроссия конкурсы башланды.
Бөтенроссия конкурсы «Яшәү өчен инфраструктура» илкүләм проекты бурычларына туры килә. Аның максатлары арасында: иң перспективалы идарәчеләрне, төзелеш һәм торак-коммуналь хуҗалык өлкәләрендәге уңышлы проектларны ачыклау һәм аларга ярдәм итү.
Быел конкурска бөтен Россиядән төзелеш комплексы идарәчеләреннән 48 меңнән артык гариза бирелгән. Катгый күп этаплы сайлап алу эксперт советына 300 ярымфиналистны аерып алырга мөмкинлек бирде – нәкъ менә алар хәзер финал сынауларына әзерләнәләр.
Ярымфиналга чыгучылар арасында Чаллы шәһәренең «Параллакс Поволжье» инжиниринг компаниясенең комплекслы проектлар буенча директоры Николай Кириленко да бар.
«Миңа үз компаниям кысаларыннан чыгу, үз предприятиеләре дәрәҗәсендә генә түгел, ә бөтен төзелеш тармагы дәрәҗәсендә карарлар кабул итүчеләр белән хәзерге вакыт сынаулары турында фикер алышу мөһим. Шулай ук инженерлык системалары, бина һәм корылмаларны эксплуатацияләү өлкәсендә безнең перспектив эшләнмәләрне киңәйтү өчен партнерлар табу кызыклы. Яңа фикердәшләр белән без бөтен тармак үсешенә уңай йогынты ясаячак реаль инициативаларны башлап җибәрә алырбыз дип ышанам», – дип сөйләде Николай Кириленко.
Конкурсның финалы 13-16 августта Сарытауда төзүчеләр көненең 70 еллыгын бәйрәм итү уңаеннан узачак. Финал дискуссияләре төзелеш комплексының иң көчле идарәчеләрен берләштерәчәк. Мәйданчыкта перспективалы идеяләр яңгыраячак, стратегик бурычлар турында фикер алышачаклар һәм тармак ориентирлары була алырлык чишелешләр эшләнәчәк.
Николай Кириленконың шундый әһәмиятле төзелеш конкурсында җиңүен телибез!