Яр Чаллының 42 һәм 43 микрорайоннарында суүткәргеч челтәрләрен заманчалаштыру тәмамланып килә
Чаллыда 42 һәм 43 микрорайоннарда суүткәргеч челтәрләренә капиталь ремонт ясала. Объект 74,8 млн сум финанслау белән «Тормыш өчен инфраструктура» илкүләм проектының «Коммуналь инфраструктураны заманчалаштыру» федераль программасына кертелгән.
«Татарстан Республикасы инженерлык челтәрләренең баш идарәсе» ДКУда хәбәр итүләренчә, хәзерге вакытка ремонтлана торган участокта 2150 метр озынлыкта төрле диаметрлы полиэтилен торбалар салынган. Эш барышында горизонталь юнәлешле бораулауның заманча ысулы кулланылган. Шулай ук 29 коеның 26сы монтажланган. Хәзер объектның әзерлеге 90% дип бәяләнә.
Корыч торба 1976 елда файдалануга тапшырылган һәм 80 проценттан артык тузган. Биредә гидроизоляция бозылу һәм торбалар өслегендә күпсанлы җәрәхәт коррозиясе теркәлгән. Участокта берничә тапкыр авария хәлләре бетерелде.
Суүткәргеч челтәрләрне заманчалаштыру нәтиҗәсендә 42 һәм 43 микрорайоннарда яшәүче 20 меңнән артык кешегә хезмәт күрсәтү сыйфаты яхшырачак.
Агымдагы елда Яр Чаллыда «Тормыш өчен инфраструктура» илкүләм проекты буенча коммуналь өлкәнең 15 объекты яңартылачак.