Киләсе елларга исәпләнгән бюджет проектына 135 тәкъдим кергән

Парламентның соңгы утырышында Татарстанның Дәүләт Советы депутатлары киләсе елларга исәпләнгән бюджет проектын беренче укылышта кабул итте. Аны икенче укылышка әзерләү кысаларында әлеге документка барлыгы 135 төзәтмә кертү тәкъдиме килеп ирешкән. Бүген әлеге тәкъдимнәр Дәүләт Советының Бюджет, салымнар һәм финанслар комитеты утырышында каралды. Чарада Татарстан Премьер-министры Илдар Халиков һәм Дәүләт Советы Рәисе урынбасары Юрий Камалтынов катнаштылар. Шулай үк ТР Төзелеш,архитектура һәм торак-коммуналь хуҗалыгы министрның беренче урынбасары Фәрит Хәнифов катнашты.
Татарстанның финанс министры Радик Гайзатуллин депутатларны Министрлар Кабинеты тарафыннан кертелгән төзәтмәләр белән таныштырды. Аларның гомуми саны – 103. Министр сүзләренә караганда, төзәтмәләрнең күбесе әлеге документны Россиянең Дәүләт Думасы тарафыннан кабул ителгән, киләсе елларга исәпләнгән бюджет проектына туры китерү максатыннан әзерләнгән.

Аларның кайберләренә тукталыйк. Мәсәлән, төзәтмәләрнең 11е федераль казнадан бирелә торган өстәмә бюджетара трансфертларның 1 миллиард 535 миллион сумга кадәр артуы белән бәйле. Аларның 1,4 миллиард сумы Россия Президентының май ае Указлары нигезендә аерым категория гражданнарның хезмәт хакын арттыру өчен дотацияләр булса, 8,9 миллионы “Сәламәтлек саклау өлкәсен үстерү” дип аталган дәүләт программасын тормышка ашыруга субсидия буларак бирелә. Вирусларга каршы препаратлар сатып алу өчен федераль бюджет 96,6 миллион сум акча бүлеп бирмәкче.

КПРФ фракциясе депутатларыннан килгән төзәтмәләр саны исә 30 булган. Дәүләт Советының бюджет, салымнар һәм финанслар комитеты җитәкчесе Леонид Якунин сүзләренә караганда, әлеге төзәтмәләр республика бюджетын 19 миллиард сумга арттыруны таләп иткән. “Бу мөмкин хәл түгел!”, - дип белдерде җитәкче комитет утырышы тәмамланганнан соң.

Шул рәвешле, комитет вәкилләре коммунистлар тарафыннан кертелгән төзәтмәләрнең барысын да диярлек кире какты. Фракция җитәкчесе Хафиз Миргалимов исә үз чиратында Дәүләт Советының чираттагы утырышына 7 төзәтмәне калдыруларын үтенде.

Шунысын да билгеләп үтү кирәк, утырыш барышында депутатлар нефтькә бәя төшү белән бәйле мәсьәләне читләтеп үтте. Алар бу өлкәдәге вәзгыятьнең вакытлыча гына булуына өметләнә, күрәсең. Мәсәлән, бүгенгә бер баррель Brent маркалы нефтьнең бәясе 77-78 доллар тирәсе тора. Ә республика бюджеты исә нефтькә бәя 100 доллар исәбеннән әзерләнгән.