Мәскәүдә урбанизация буенча БРИКС форумы узачак

21 июньдә Мәскәүдә «Россия» күргәзмә-форумы мәйданчыгында урбанизация буенча Форум узачак. Чара БРИКС берләшмәсе кысаларында узачак.

Форум берләшмәдә катнашучы илләр торак төзелеше һәм архитектура үсеше, уңайлы шәһәр мохите булдыру, урбанистика һәм профильле белем бирү темасына алдынгы практикалар һәм фикерләр белән алмашу мәйданчыгыннан гыйбарәт.

Программа «Шәһәр мохитен үстерүнең тотрыклы стратегияләрен формалаштыру» пленар сессиясеннән тора, анда берләшмә дәүләтләре вәкилләре чыгыш ясаячак, алар шәһәрләр төзү һәм төзелеш тармагын үстерү буенча иң яхшы практикалары һәм үз карашлары белән уртаклашачак.

Тармакны цифрлаштыру һәм шәһәрләрнең IQ турында «Акыллы шәһәр: урбанизациягә кеше үзәкле караш» сессиясендә сөйләячәкләр. «Яшел төзелеш: үсеш тенденцияләре һәм перспективалары» сессиясендә шәһәрләрнең тотрыклы үсеше һәм энергоэффектив төзелешнең глобаль тренды турында фикер алышачак.

БРИКС-иң динамик үсештә булган дәүләтләрнең дәүләтара берләшмәсе. 2024 елдан берләшмәгә 10 Дәүләт керә: Бразилия, Россия, Һиндстан, Кытай, КАР, Иран, Берләшкән Гарәп Әмирлекләре, Мисыр, Эфиопия һәм Согуд Гарәбстаны.

11:00 сәгатьтә башлана. «Россия» халыкара күргәзмәсе сайтында алдан теркәлү буенча керү. Чараны трансляцияләү күргәзмә-форум сайтында булачак: https://russia.ru/

Исегезгә төшерәбез, БРИКС саммиты агымдагы елның октябрендә Казанда узачак. Бу көннәрдә Татарстан башкаласында БРИКС уеннары уза.