ЯҢАЛЫКЛАР
Күп фатирлы йортларны, социаль-мәдәни һәм авыл хуҗалыгы өлкәсе объектларын капиталь ремонтлауның барышы турында ТР Хөкүмәте йортында узган киңәшмәдә Татарстанның төзелеш, архитектура һәм торак-коммуналь хуҗалыгы министры Фәрит Хәнифов сөйләде.
Киңәшмәне барлык муниципаль районнар белән видеоконференцэлемтә режимында ТР Премьер-министры Алексей Песошин уздырды.
Фәрит Хәнифов хәбәр иткәнчә, 2020 елда күп фатирлы йортларны капиталь ремонтлау программасы буенча 1066 объектта эш планлаштырылган, бүгенге көндә эшләрнең 44%ы үтәлгән.
Гомуми белем бирү оешмаларын капиталь ремонтлау программасы буенча быел 36 мәктәпне ремонтлау планлаштырыла. 6 августка 29 объектта эшләр бара, калганнары куллануга әзер. Эш өч коррекцион мәктәптә дәвам итә, мәктәпкәчә белем бирү оешмаларында 87 объектны ремонтлау планлаштырылган, 64 объектта эш бара, 23 объектта эш тәмамланган.
Ике ресурс үзәгендә, ике яшьләр үзәгендә, 4 балалар сәламәтләндерү лагерендә, 3 стационарда, 7 сәламәтлек саклау объектында, 17 мәдәни объектта, бер мәдәният өлкәсендә белем бирү учреждениесендә, ТР буенча Эчке эшләр министрлыгы карамагындагы бер мәгариф учреждениесендә, 9 социаль хезмәт күрсәтү учреждениесендә, 4 муниципаль архивта, 2 урманчылык бинасында һәм Башкарма комитетның 12 бинасында капиталь ремонт тәмамланган.
Авыл хуҗалыгы объектларына килгәндә 70 сыер абзарында, 71 ындыр табагында, 25 машина-трактор паркында, 1 яшелчә-бәрәңге саклагычта, 2 кошчылык фермасында, 3 ат фермасында, 37 ветеринария берләшмәләре биналарында һәм авыл хуҗалыгы идарәләрендә капиталь ремонт тәмамланган.
Шулай ук 131,5 км суүткәргеч уздырылган, 17 скважина борауланган, 20 су кудыру башнясы куелган, 11 мең 251 яктырткыч урнаштырылган.
«Татэнергосбыт» АҖ яшьләрне һәм урта яшьтәге вәкилләрен якын кешеләр турында кайгыртырга һәм үз әниләрен, әтиләрен, әбиләрен, бабайларын өйләреннән чыкмыйча гына компания белән хезмәттәшлек итәргә өнди. Акциядә катнашу өчен: Instagram – tatenergosbyt социаль челтәрендә «Татэнергосбыт» АҖ рәсми сайтына язылырга; «Татэнергосбыт» АҖнең шәхси кабинетында исәпләү приборлары күрсәткечләрен түләү һәм тапшыру темасына өлкән туганнары, дуслары һәм танышлары белән видео төшерергә; роликны #МыЗаОнлайн хештегы белән социаль челтәргә урнаштырырга һәм @tatenergosbytны билгеләргә; матбугат үзәгенә pc@tatenergosbyt электрон почтасына анкета, катнашучының шәхси мәгълүматларын эшкәртүгә ризалык һәм видеороликка сылтама җибәрергә. Акциянең тәртибе һәм шартлары белән «Татэнергосбыт» АҖ рәсми сайтында танышырга мөмкин.
Хөрмәтле хезмәттәшләр һәм Татарстанның төзелеш комплексы ветераннары!
Быел безнең һөнәри бәйрәмебез-төзүчеләр көнен СССР Югары Советы Президиумы Указы нигезендә билгеләнгән вакыттан 65 еллыгын билгеләп үтә.
Татарстан Республикасы Төзелеш, архитектура һәм торак-коммуналь хуҗалык министрлыгы һәм шәхсән үз исемемнән Сезне әлеге искиткеч вакыйга белән тәбрик итәм!
Төзелеш тармагының торышы күп яктан төбәк үсешенең икътисади дәрәҗәсен билгели. Матур-матур биналар, яр буе корылмалары, спорт объектларының барысы да – иң мөһим, катлаулы һәм киеренке һөнәр ияләренең тырышлыгы белән сафка бастырылган. Сезгә карата соклану хисләрен белдерәсем һәм бөтен кешенең дә әлеге тармакта эшләргә батырчылык итмәвен искәртәсем килә. Төзүчеләр җилкәсендә һәр объект өчен зур җаваплылык ята.
Сезнең хезмәтегез кешеләргә, туган һәм яраткан илебезгә бик тә кирәк. Хәтер һәм Дан елында, ТАССРның 100 еллыгын бәйрәм иткән көннәрдә Сез фидакярлек, рухи ныклык үрнәге күрсәтәсез, шәһәрләр һәм авылларда мөмкин булган кадәр уңайлы шартлар тудыру өчен барысын да эшләргә тырышасыз.
Ел барыбыз өчен дә катлаулы булды. Гомуми эшкә тугрылык, җаваплылык һәм югары һөнәри осталык нәтиҗәсендә иң кыю бурычларны да хәл итү көчебездән килә. Без – бер команда!
Бәйрәм көнендә Сезгә мактаулы эшегез өчен ихлас күңелдән рәхмәт әйтәсем килә. Сезгә ныклы сәламәтлек, уңышлы эш көннәре, иминлек, оптимизм һәм иртәгесе көнгә ышаныч телим!
Төзелешкә документларны рәсмиләштерүнең яңа кагыйдәләре административ йөкләнешне киметәчәк һәм яңа объектлар төзү вакытын шактый киметергә мөмкинлек бирәчәк. Гадиләштерелгән система буенча тормышка ашырылган беренче проект РКЙАХнең яңа корпусы булды, аны төзүгә нәкъ йөз көн тотылган иде. Бу хакта «Татар-информ» мәгълүмат агентлыгында узган матбугат конференциясендә ТР Төзелеш, архитектура һәм ТКХ министры урынбасары Владимир Кудряшев хәбәр итте. «Июльдән алып озату документларының 30% ы рекомендацияләр рәтенә күчерелде. Иске шартларда, әйтик, типлы хастаханә төзелешенә 23-29 ай кирәк булачак, ә хәзер вакыт сизелерлек кимиячәк. Бүгенге көндә мондый хастаханә төзелешенә 10 айга кадәр вакыт китәчәк», — диде Кудряшев. Ул билгеләп үткәнчә, әгәр элек проектлау һәм төзелеш өчен барлык 30 айга якын вакытның бишенче өлешен генә алып торса, калганын рөхсәт алу, документларны рәсмиләштерү һәм мондый эшчәнлек алып баруга киткән булса, яңа системада төзелеш һәм проектлау инде вакытның яртысын били.
Проектның өстенлеге практик консультацияләр белән академик якын килүне берләштерүдән гыйбарәт. Бүген Татарстан Төзелеш, архитектура һәм торак-коммуналь хуҗалык министры Фәрит Хәнифов муниципалитетлар вәкилләре һәм төзелеш тармагы белгечләре өчен яңа белем бирү курсына старт бирде. «Территорияне комплекслы үзләштерү»: Татарстан Республикасында индивидуаль торак төзелешен үстерү буенча кыска сроклы квалификация күтәрүнең 72 сәгатьлек программасы шулай дип атала. Дәресләр дистанцион форматта, эштән аерылмыйча гына узачак. Укытучылар составына 42 кеше керә, шуларның 11 – Казан дәүләт архитектура-төзелеш университетының профессиональ лекторлары, 31 – ведомство лекторлары (министрлыклар һәм предприятиеләр вәкилләре). Бу нисбәтне очраклы түгел, укыту ¼ теорияне, ¾ практиканы күздә тота. Курс тәмамлангач, һәр катнашучы тест бирергә тиеш. Белемнәрне бәяләүнең уңай нәтиҗәләре булганда, тыңлаучыларга Татарстан Республикасында индивидуаль торак төзелешен үстерү буенча квалификацияне күтәрү турында Казан дәүләт архитектура-төзелеш университеты таныклыгы бирелә.
Йогышлы авырулар хастаханәсенең икенче корпусын 2020 елның апрелендә төзи башладылар. Хастаханә проектын «Татинвестгражданпроект» ДУП эшләгән. Генподрядчы - «Ак таш» ҖЧҖ. Дүрт катлы бина 232 койкага исәпләнгән. Кирәк булганда аларның санын 504 койкага кадәр арттырырга мөмкин. Беренче катны кабул итү-диагностика бүлеге, 12 койкага исәпләнгән анестезиология һәм реанимация бүлеге, шулай ук сөт катнашмалары әзерләү һәм калдыкларны зарарсызландыру блоклары били. Икенче катта 20 урынлы палата һәм бокслау бүлекләре урнашкан. Соңгылары тагын өченче һәм дүртенче катларда да бар. Яңа йогышлы авырулар хастаханәсен заманча югары технологияле медицина җиһазлары, шул исәптән ИВЛ аппаратлары, компьютер томографы, рентгенология, эндоскопик һәм УЗИ-җайланмалар белән җиһазлау планлаштырыла. Төп корпустан тыш, 1,5 мең кв.м мәйданлы бина төзелгән, анда лаборатория корпусы урнашкан. Шулай ук объект составына контроль-үткәрү пункты, котельный, кислород станциясе, дизель-генератор һәм канализация насос станциясе керә.
Бүген Алабуга шәһәрендә 1224 урынга исәпләнгән мәктәп файдалануга тапшыруга рөхсәт алды. Мәктәпнең мәйданы-24 710 кв. м., 4 кат. Объект түбәндәге адрес буенча урнашкан: Б. Урманче ур., 7А йорт. Исегезгә төшерәбез, агымдагы елда Татарстан Республикасында гомуми егәрлеге 7 076 укучы урыны булган 8 мәктәп төзелеше планлаштырылган.
2024 елда Татарстанда 3,6 млн.кв. метр торак файдалануга тапшырылырга тиеш, шуның 1,8 млн. кв. метры – шәхси торак төзелеше. Шәхси йорт төзелеше өлешен торак төзелешенең гомуми күләмендә 40тан 50% ка кадәр арттыру планлаштырыла. «Соңгы 10 елда торак тапшыруның гомуми күләмендә индивидуаль торак төзелеше өлеше 40-45% тәшкил итә. 2020 елдан 2024 елга кадәр шәхси торак төзелеше күләмен 1,8 млн.кв. метрга кадәр арттыру планлаштырыла. Без төзелеш күләмен генә арттырып калмыйча, шәхси торак төзелеше инвестицион-төзелеш проектлары белән идарә итү өлкәсендә базарда катнашучыларның белемнәрен дә арттырырга планлаштырабыз», - диде ведомство башлыгы ТР Хөкүмәте Йортында узган киңәшмәдә. 4 августтан Казан дәүләт архитектура-төзелеш университеты базасында ШТТ үсеше буенча программа старт ала. Укыту муниципаль берәмлекләрнең башкарма комитетларының җитәкчелек составы һәм төзелеш өлкәсендә эшләүче белгечләр өчен каралган. Проектны оештыручылар: ТР Төзелеш, архитектура һәм ТКХ министрлыгы, «КазГАСУ» ЮҺБ ФДБМУ, «Татарстан Республикасының төзелеш һәм архитектура буенча дәүләт экспертизасы һәм бәя кую идарәсе» ДАУ, «Рәссәйнең баш дәүләт экспертизасы идарәсе» ДАУ Казан филиалы. 72 сәгать дәвамындагы Программа, төп эштән аерылмыйча гына, видеоконференцэлемтә режимында дистанцион укытуны күздә тота. Укуларны КДАТУның әйдәп баручы укытучылары һәм министрлыклар һәм ведомстволарның квалификацияле белгечләре үткәрәчәк.
2020 елның 3 августыннан Сбербанк ГАҖ «Татарстан Банкы» бүлекчәсендә «Авыл ипотекасы» авыл ипотека кредитына дәүләт ярдәме программасында катнашу өчен гаризалар кабул итү башланды. «Авыл ипотекасы» программасы республиканың авыл территорияләрен үстерүгә исәпләнгән һәм шуңа күрә анда кайбер чикләүләр бар. Барыннан да элек, ипотека кредиты бары тик авыл җирлегендә күчемсез милек сатып алу өчен генә бирелә-әлеге программа буенча шәһәр эчендә шәхси йорт сатып алып булмый. Шулай ук программада катнашучы фатирын яки йортын алыш-биреш ясаганнан соң биш ел дәвамында сата алмый, хәтта әгәр ул кредитны түләсә дә. «Авыл ипотекасы» программасы буенча ташламалы ставка еллык 3% тәшкил итә. Әмма Сбербанк клиентларына «Электрон теркәлү» сервисыннан файдаланганда 0,3 процент пункт күләмендә ташлама бирелә. Нәтиҗәдә, ставканың күләме 2,7% ка кадәр кимергә мөмкин. Аерым шартлар: РФ Хөкүмәтенең 31.05.2009 ел, № 696 карары буенча заемчыга/заемчыларга «Авыл ипотекасы» дәүләт программасы кысаларында 1 кредиттан да артмаган күләмдә бирелә ала. Заемчы/заемчылар «Авыл территорияләрен комплекслы үстерү» РФ Дәүләт программасы чараларын гамәлгә ашыру кысаларында алынган социаль түләү акчаларын беренчел взнос сыйфатында кулланырга хокуклы түгел.
Татарстан Республикасында төзелештә хезмәтне саклау кысаларында контроль-күзәтү органнары тарафыннан төзелеш объектларын тикшерү дәвам итә. Ел башыннан 717 тикшерү уздырылган.
Бу хакта бүген ТР Хөкүмәте йортында узган киңәшмәдә ТР төзелеш, архитектура һәм ТКХ министры Фәрит Хәнифов хәбәр итте.
Киңәшмәне видеоконференция режимында ТР Премьер-министры Алексей Песошин уздырды.
30 июльгә булган мәгълүматлардан күренгәнчә, Татарстанда 1млн 504,8 мең кв. м. торак файдалануга тапшырылган, бу планда билгеләнгән торакның 50,5%ы.
ТР Президенты каршындагы Дәүләт торак фонды инвестиция программасы буенча 1285 фатирлы 52 йорт төзелгән, аларның гомуми мәйданы 74,6 мең кв. м. тәшкил итә. Узган ике атнада гомуми мәйданы 17,2 мең кв. м. булган 30 йорт файдалануга тапшырылган.
Күп фатирлы инвестицион торак программасы буенча 2020 елда 117 күп фатирлы йорт төзү каралган. Аларның торак мәйданы 1 млн 317,2 мең кв. м. тәшкил итәчәк.
Моннан тыш, шәхси торак төзелеше буенча 2020 елда 10 мең 680 йорт төзү планлаштырыла. 30 июльгә 7 мең 56 йорт файдалануга тапшырылган.
Аннары министр торак белән тәэмин итүдә гражданнарга дәүләт ярдәме кысаларында 1 млрд 193,4 млн сумга 728 гаиләнең торак шартларын яхшырту планлаштырыла, дип белдерде.
Күп балалы гаиләләрне торак белән тәэмин итү буенча барлык күп балалы 46 гаиләгә сертификатлар рәсмиләштерелгән. 30 июльгә 27 сертификат бирелгән.
Яшь гаиләләрне торак белән тәэмин итү буенча 30 июльгә 35 яшь гаиләгә субсидияләр күчерелгән.
Алга таба Фәрит Хәнифов социаль-мәдәни объектлар, фельдшер-акушерлык пунктлары, универсаль спорт мәйданчыклары, чаңгы базалары, авыл клублары, балалар сәламәтләндерү лагерьлары, сыр һәм сарык фермалары, силос-сенаж траншеялары, авыл советы биналары төзелешләре турында мәгълүматлар җиткерде.